《二零二三大事回顧》
上年十一月，我將二三年命名為Cimjün，意為「永續的拂曉」。而家睇返轉頭，是否永續仍然係未知之數，但至少未落山。為咗承接舊年嘅「覺悟」，我今年寫咗數十篇文章，涉獵不同社會同人生領悟問題。社會方面，我試圖運用閱讀所學，增進自己對自由主義、政治宣傳、民主、異議、身份政治、民族主義、民粹主義等嘅理解。雖然只得半桶水，但起碼未到人生嘅中午。人生領悟嘅話，我諗好少人越大越唔成熟嘅。我認為今年嘅成長係僅次於上年，處理問題嘅信心、面對權威嘅態度同膽色都有長足嘅發展。而今年日本文化係我個人成長嘅重要催化劑。
三月十九日，我喺YouTube慕名而搜尋咗「Ado」呢個名。「うっせぇ うっせぇ うっせぇわ」（《Usseewa》）嘅旋律從此喺我腦海迴盪。「1・2・3で 弾け飛んだ 固定観念 バットで打って」（《Readymade》）更加係我今年喺YouTube聽得最多嘅歌，總共367次。Ado唱出嘅反叛並非我嘅反叛——佢純粹係表達對整個社會嘅不滿，我係對部分規則同制度嘅不滿。但點都好，佢生動、感情化嘅表現，係間接地觸發、鼓勵咗一場為自己嘅戰爭。一場鬥腦力、邏輯同理性嘅戰爭，一場情緒只有五條地位嘅戰爭（※ 前期重要，後期將任務交託俾主角）。
八月二日，我再次因慕名，喺YouTube搜尋咗《廻廻奇譚》呢首歌。嗰時我仲未知呢首係《咒術迴戰》嘅主題曲，而呢個發現隨後大幅加強咗我嘅自信。我發現身為一個青少年，我都係常見病「中二病」嘅帶菌者。既然有人可以唯我獨尊，點解我唔得？「無茶苦茶にしてくれないかい？」（《Specialz》），思索後答「可以」或者係自信嘅表現。
嚟緊嘅呢一年，一定要繼續理性地情緒化、情緒化地理性！小心過濾情緒、用不滿嘅情緒鼓勵自己思考。同時要緊記「EGCB（Extol the good, chastise the bad）」同「談往事不談今事，談今事不談往時」嘅原則，呢啲喺處理學校議題時尤其重要。最重要係維持理性、有意義嘅溝通，萬萬不可令有識之士嘅努力白費。因此，新一年取名為Cüngngüsaníet，意為「不偏頗的溝通」。【目標為建造有識之士（我最睇唔起嗰啲不知變通、蠻不講理、淨係識自以為是嘅人，呢啲人已喪失邏輯批判能力，咁考慮佢哋嘅意見做咩？只要識得反省自己嘅人，都可以係有識之士*。）眼中最有邏輯、最符合大眾利益、最唔同流合污、最獨樹一格、最出類拔萃、同時又符合現實嘅校園環境同規則。】最後祝大家五日後開始嘅新年萬事勝意。
最後一樣野，由於「Matthew」太過普遍，我更名為「Matheo」（/maˈθɛ.oʊ/）。
P.S. 你可能覺得，我係晨早流流起身打呢篇文，但實情係，我係朝早六點鐘臨瞓前打㗎。
* 唔知大家有冇聽過鄧小平講過：「如果中國……在世界上稱王稱霸，到處欺負人家、侵略人家、剝削人家，那麼世界人民……就應當揭露它、反對它，並且同中國人民一道打倒它。」同理，假如有人用呢招「有識與否」嘅準則，胡亂禁言其他人，就應當揭露、反對、打倒他。但這明顯需要公眾嘅「有識」同理智。